Iceland Airwaves tilkynnti í dag fyrsta listafólkið sem fram kemur á hátíðinni í ár, sem haldin verður í miðborg Reykjavíkur dagana 4.–8. nóvember 2026. Hátíðin heldur uppteknum hætti og beinir sjónum sínum að frjórri grasrót íslensku tónlistarsenunnar, ásamt því að bjóða því ferskasta sem er að gerast á alþjóðavísu í heimsókn. Tilkynnt hafa verið 28 atriði á aðaldagskrá hátíðarinnar, þar af 12 íslensk, ásamt þremur hliðarviðburðum sem allir fara fram í Hörpu.

12 íslensk atriði á aðaldagskrá og Daði Freyr í Eldborg 

Íslenska listafólkið er í forgrunni að vanda. Samhliða nöfnum á borð við Júníus Meyvant, Axel Flóvent, MAMMÚT, Emmsjé Gauta og Árný Margréti – sem öll hafa markað djúp spor á hátíðina og íslenskt tónlistarlíf undanfarin ár – ber hæst að nefna eftirtektarverða bókun á íslensk-filippseysku ævintýrapoppstjörnunni Yaelokre.

Þótt Yaelokre sé ef til vill ekki enn á hvers manns vörum hér á landi, er um að ræða eina af skærustu stjörnunum sem landið hefur getið af sér á síðustu árum. Tónleikarnir á Iceland Airwaves marka jafnframt fyrsta sinn sem hán stígur á svið á Íslandi síðan hán sló rækilega í gegn á TikTok árið 2024.

Daði Freyr hefur einnig staðfest þátttöku sína, en hann mun koma fram ásamt Sinfóníuhljómsveit Íslands á sérstökum hliðarviðburði í Eldborgarsal Hörpu á fimmtudagskvöldinu.

Grasrótin verður auðvitað einnig í brennidepli, enda er hátíðin einna þekktust sem mikilvægur stökkpallur fyrir ungt íslenskt tónlistarfólk. Meðal staðfestra bókana má nefna partísprengjurnar í Inspector Spacetime og Amor Vincit Omnia, tilraunapopparann Róshildi, framúrstefnurokkarana virgin orchestra, skósýnis (shoegaze) brautryðjendurna Oyama og glænýja fólkdúettinn TÁR.

Alþjóðlegir hápunktar 

Meðal helstu alþjóðlegra bókana má nefna tónleika breska malbiksskáldsins The Streets í Eldborg á sunnudagskvöldinu. Þar mun listamaðurinn flytja goðsagnakennda fyrstu plötu sína, A Grand Don’t Come for Free, í fullri lengd í fyrsta sinn.

Breska klúbbadrottningin Shygirl mætir einnig til leiks, en hún mun koma fram á hliðarviðburði í Silfurbergi á miðvikudagskvöldinu 4. nóvember. 

Nánari upplýsingar og miða á hátiðina má finna á síðu Iceland Airwaves

Listafólkið sem tilkynnt var í dag (íslenskt listafólk feitletrað): Adult DVD (UK) | Amor Vincit Omnia (IS) | Arima Ederra (US) | Arny Margret (IS) | Axel Flóvent (IS) | Bana Zahiti (XK) | Bleech 9:3 (IE) | David Bay (DE) | Dove Ellis (IE) | Emmsjé Gauti (IS) | HÉR (PL) | Inspector Spacetime (IS) | Joe & the Shitboys (FO) | Júníus Meyvant (IS) | KOIKOI (RS) | Liim (US) | MAMMÚT (IS) | Oyama (IS) | PISS (CA) | Pollyfromthedirt (UK) | Róshildur (IS) | RSP (FO) | Skeler (AU) | SYL (DK) | TÁR (IS) | Tunghoyrt (FO) | virgin orchestra (IS) | Yaelokre (PH/IS)